Enrico Toti (Rome, ai 20 di Avost dal 1882, Monfalcon, ai 6 di Avost dal 1916) al fo un eroi talian de prime vuere mondiâl.
A Enrico Toti i mancjave la gjambe çampe, pierdude intun incident sul lavôr (al lavorave come prenâr par lis feradis talianis), e par chest al scugnive lâ ator cuntune croçule. Cuant che e scomençà la prime vuere mondiâl, Toti, che al jere une vore patriotic, al rivà a fâsi arolâ tai bersalîrs cicliscj, e al vignì mandât sul front dal Cjars. Ai 6 di avost dal 1916, dilunc la sieste bataie dal Lusinç che e permetè ai talians di cjapâ Gurize, Enrico Toti, slançât cul so repart al assalt di cuote 85 di Monfalcon, al fo ferît plui voltis dai austriacs e, prime di colâ par tiere muart, al tirà la croçule cuintri il nimì, berghelant "Nun moro io" (Jo no mûr) e bussant lis plumis dal elmet.
Par chest al è stât decorât cu la Medaie d'Aur al Valôr Militâr motu proprio dal Re in persone, (nol jere imatricolât sicu militâr par vie de so inabilitât), "par che al sedi tramandât il ricuart gloriôs e eroic a lis gjenerazions futuris."
Il cadavar al fo traspuartât inizialmentri a Monfalcon, ma il 24 di Mai dal 1922 al fo movût a Rome, dulà che al ricevè i solens funerâi. Tai zardins dal Pincio, a Rome, e a Gurize al fo eret un monument in bronç.